ITR Update 2025: જો તમે હજી સુધી તમારું ઈન્કમ ટેક્સ રિટર્ન (ITR) ફાઈલ કર્યું નથી, તો તમારા માટે આ મહત્વપૂર્ણ સમાચાર છે. હાલ ટેક્સપેયર અને ચાર્ટર્ડ એકાઉન્ટન્ટ્સ બંનેને આ વર્ષે રિટર્ન અને ઓડિટ ફાઈલિંગમાં અનેક મુશ્કેલીઓનો સામનો કરવો પડી રહ્યો છે. આ પરિસ્થિતિને ધ્યાનમાં રાખીને એસોસિએશનો દ્વારા સરકાર પાસે આઈટીઆરની ડેડલાઇન વધારવાની માંગણી કરવામાં આવી છે.
હાલમાં આઈટીઆર ફાઈલ કરવાની અંતિમ તારીખ 15 સપ્ટેમ્બર 2025 નક્કી કરવામાં આવી છે. જો કે, જો આ તારીખ એક મહિના માટે વધારી દેવામાં આવે તો નવી ડેડલાઇન 15 ઓક્ટોબર 2025 સુધી થઈ શકે છે.
શું કહ્યું એસોસિએશને ?
એટિબીએ (ATBA) ના નેશનલ જનરલ સેક્રેટરી ઓમ કુમારે જણાવ્યું કે આ વર્ષે રિટર્ન અને ઓડિટ ફાઈલિંગ માટે ઘણી ટેક્નિકલ તકલીફો સામે આવી રહી છે. તેઓએ નાણાં મંત્રીને આપેલી રજૂઆતમાં અનેક કારણો દર્શાવ્યા છે, જેમ કે –
- AIS ડેટામાં તફાવત
- શેર અને સિક્યુરિટીઝની ખોટી એન્ટ્રી
- ટી.ડી.એસ. ખોટા હેડ હેઠળ દેખાવું
- CGAS વિગતોની અનાવશ્યક માગણી
KSCAAનું મોટું નિવેદન
કર્ણાટક સ્ટેટ ચાર્ટર્ડ એકાઉન્ટન્ટ્સ એસોસિએશન (KSCAA) એ 10 સપ્ટેમ્બરના રોજ આપેલી રજૂઆતમાં લખ્યું છે કે ITR-5, ITR-6, ITR-7 અને અનેક ઓડિટ ફોર્મ્સ જુલાઈ-ઓગસ્ટમાં જ જાહેર કરવામાં આવ્યા છે. આ ફોર્મ્સ એપ્રિલની શરૂઆતમાં જ ઉપલબ્ધ થવા જોઈએ હતા. આ કારણે ટેક્સપેયર્સ અને પ્રોફેશનલ્સને ખૂબ ઓછો સમય મળ્યો છે.
તારીખ વધશે કે નહીં ?
હવે મોટો સવાલ એ છે કે સરકાર દ્વારા તારીખ વધારવામાં આવશે કે નહીં? હકીકતમાં, સરકારે પહેલાથી જ 31 જુલાઈ 2025ની ડેડલાઇન વધારીને 15 સપ્ટેમ્બર 2025 કરી છે. તેથી ફરીથી તારીખ વધવાની સંભાવના ઓછી જણાઈ રહી છે. તેમ છતાં ટેક્સપેયર્સ માટે રાહતરૂપ સમાચાર આવી શકે એવી અપેક્ષા વ્યક્ત કરવામાં આવી રહી છે.
નિષ્કર્ષ: જો તમે હજી સુધી ITR ફાઈલ નથી કર્યું, તો અંતિમ દિવસ સુધી રાહ ન જુઓ. શક્ય તેટલું વહેલું કામ પૂર્ણ કરો, જેથી દંડ કે અન્ય મુશ્કેલીનો સામનો ન કરવો પડે.
Read more-અચાનક પૈસાની જરૂર ? Bank of Baroda આપશે ₹1 લાખ લોન ફક્ત 10 મિનિટમાં
